【明報專訊】自從港珠澳大橋通車，昂坪360周不時都大排長龍。昂坪360噚日宣布，上年到訪客人有183萬，按年大升七成半，而每日平均到訪賓客人數升到5385，創10年新高，到今年農曆新年依然旺場，當中內地客按年升三成。昂坪360署理董事總經理劉偉明就話，大家唔好成日記住上年底大排長龍嘅墟冚畫面，「想話畀香港人知昂坪360並唔可怕」。

今起維修 27號重開

為咗令港人擺脫心理陰影，佢仲宣布由下個月起，香港人只要實名喺網上買飛同預約，就可以喺星期六、日同公眾假期特快登車。凡係身分證號碼有3、6、0其中兩個數字，就可以喺3月同6月嘅時候免費搭纜車，不過昂坪360今日開始維修，今個月27號先會重開，想免費搭纜車都要等一等嘞。