【明報專訊】九西補選結束兩個月，候選人先後提交選舉開支，前立法會議員馮檢基申報使咗約102.6萬元，以佢共獲12,509票計，每票平均82元。開支當中，約31.26萬嚟自捐款，最大筆捐款嚟自基哥太太陳敏慈捐出嘅10萬元。基哥喺造勢大會講過，太太曾經叫佢唔好喺屋企講選舉，其後就畀咗張支票佢話當眾籌，當時佢講完同太太都分別落淚。 最大筆捐款10萬 嚟自太太 至於其他捐款，名為High Express Ltd嘅公司捐出5萬，「小巴大王」馬亞木個仔馬僑生亦捐出3萬，喺3．11補選參選九西嘅蔡東洲亦捐出5000元；仲有約4萬元嚟自1000蚊以下嘅眾籌。 基哥最大筆開支用於選舉廣告，大約花咗51.8萬。雖然基哥喺去年9月19日先講如果劉小麗被DQ無得選，佢先考慮參選，但根據申報，佢喺9月17日已製作6部小巴嘅廣告，花約4萬；10月再喺22部小巴登廣告，花約11萬。另外，基哥票數多過5%有效選票，以每票14元開支計，可拎番約17.5萬。
|
| |
| |
;)
