【明報專訊】噚日勞工及福利局長羅致光(CK)喺立法會福利事務委員會特別會議為長者綜援風波解畫，跨黨派議員火力全開炮轟政府。熱血公民鄭松泰(泰博)同工聯會何啟明，唔知係咪太勞氣，發言時疑似「爆粗」。委員會主席鄺俊宇同Emily講，當時聽得唔清楚，要求佢哋再講一次時就無不當，所以無採取跟進行動，但就呼籲議員無論幾勞氣都好，都要注意言行。 泰博講到CK話扣減200蚊綜援金同埋安排長者見勞工主任係幫60至64歲人士搵工，愈講愈勞氣，「如果我無聽錯的話，我真係代嗰班長者多×謝佢！」，CK隨即澄清自己無咁講，泰博就話「我真係多謝佢啦」。 對於60至64歲願意工作的健全綜援受助人，兩年內可以拎到最多2000元津貼，何啟明就反問CK「2000蚊夠你搭幾多次車？」，批評做法「笨×」，其後先話係「好笨嘅做法」。 工聯會陸頌雄就關注初老者身體情况，佢話CK早前講自己都可以游渡海泳，不過唔係個個長者都好似佢咁fit。CK忍唔住澄清，其實當時係叫區諾軒游渡海泳，唔係講自己游渡海泳。
|
| |
| |
;)
