【明報專訊】Emily噚日報道，政府就4000蚊派錢措施向市民派表，好多政黨都幫街坊填表，而民建聯嘅協助申請表格以細字標示該黨會收集個人資料，引起泛民批評。有建制派地區人士反駁，話泛民亦不時藉唔同活動收集資料，認為係「只許州官放火」，好似區諾軒(區軒)上年做地區問卷時，同樣收集個人資料，更寫明其中收集目的包括「就選舉進行宣傳」。區軒就向Emily解釋，兩者收集嘅資料內容不一，批評民建聯收集嘅資料「連借錢都可以幫佢(市民)搞埋」。

相關問卷調查由區軒伙地區人士進行，關注西環邨重建計劃，街坊答咗3條選擇題後，要留低姓名、電話、電郵同所住樓宇，問卷交代多項收集個人資料目的，除咗幫市民跟進投訴外，亦會「就選舉進行宣傳」。

區軒話，只要光明正大表明收集資料作聯繫用途，並經事主同意，係無問題，「但如果以填寫$4000福利為名，連帶收集身分證副本、銀行資料，連借錢都可以幫佢搞埋」，就係另一回事。佢話個人資料用途廣泛，街坊容易因為4000蚊利益忽略細節聲明，「平白給了私人資料他人」。誰是誰非，讀者自行判斷。