【明報專訊】每年年宵都製造大量垃圾，為減廢環運會同環保署於2017年起推行綠色年宵，除宣傳減廢信息，亦拯救唔少有用物資。下周三起舉行嘅綠色年宵將由去年5個擴展至全港15個年宵市場，有環團會回收竹枝用於竹藝創作，亦有團體延續去年受歡迎嘅「執嘢」活動，將回收物資轉贈有需要市民。

副環保署長郭黃穎琦話，除廢紙、金屬同塑膠，今年新增回收物料包括廚餘、發泡膠、木卡板等，環團亦會喺現場派再生利市封同環保袋。為推動乾淨回收，食環署自行研發一款「乾淨回收器」(圖)，由蒸餾水樽及手動水泵組成，方便將膠樽同鋁罐清洗後再回收。

年宵市場嘅熟食檔使用大量膠餐具，去年觀塘年宵試行可重用餐具借用服務，反應理想，今年擴展至所有設有熟食檔嘅年宵市場。「執嘢」係最受市民歡迎活動，環保觸覺高級項目經理何嘉寶話，該組織去年為荃灣年宵回收有用物資，雖然要運到「綠在沙田」咁遠，但都無阻市民喺大年初四早上到門外排隊，免費領取可重用物品，例如園藝用品、T恤、小型家電如微波爐等，唔少仲係全新嘅。環保署話今年各區都有學校同社區中心借出場地喺新春期間暫存有用物資，但「執嘢」嘅地點同時間仍有待環保署公布，市民要留意。