【明報專訊】香港迪士尼樂園今個月底第一次參加美酒佳餚巡禮，到時會推出3款菜單，有中西式點心兼甜點，每款都有卡通人物，其中三眼仔菜肉包原來好難整㗎，要好小心整個嘴，「如果唔係(蒸完)佢就唔識笑」。 Emily噚日率先試食，每款都一啖可以放落口，十分精緻。負責中式「迪士尼魔法點心」嘅迪士尼廚師長胡發祺就話，咁多款點心中，三眼仔菜肉包係最難整，因為廚師要逐個逐個揑，亦要注意個包加熱發脹效果，然後再加耳仔同眼睛，拿揑唔好就會甩眼甩耳！ 華特三重奏菜單 4個月前研究 設計西式鹹點「華特三重奏」嘅迪士尼行政西廚麥錦駒就講，佢哋4個月前已開始研究菜單，希望可以兼顧戶外食物安全，同時又能夠方便到時無得坐嘅食客。3款喺美酒佳餚提供嘅菜單都係賣120元，每Set會有3至4件小點心或甜品，買兩Set就220元，美酒佳餚巡禮獨有嘅「華特三重奏」會有同埋阿Jack帶子蟹肉芝士慕絲多士等美食。 迪士尼度假區餐飲部總監黃慶龍話，會喺美酒佳餚巡禮推港人專享嘅「迪士尼朋友自助餐套票」，憑票可於一年內喺3間餐廳任選兩餐或三餐自助餐套票，兩餐套票賣988元，三餐套票賣1288元。如果喺美酒佳餚巡禮現場買，仲送神秘禮物！
|
| |
| |
;){kind=small}
;)
