【明報專訊】陳凱欣前日表態話會積極考慮參加11月九龍西立法會補選，建制派由佢做代表似乎已經塵埃落定。經民聯深水埗區議員梁文廣(圖)一直都躍躍欲試，想參加補選，經民聯主席盧偉國噚日話，佢哋支持黨內嘅年輕成員喺各平台為社會服務，不過補選呢，就會支持建制派整體協調嘅結果，聲稱目前仍未完成。至於點睇陳凱欣，盧偉國就話每次選舉形勢都有唔同變化，佢就唔評論喇。

喺九龍社團聯會力谷陳凱欣做「健康大使」期間，梁文廣都一直冇放棄，頻頻喺facebook上載短片。經民聯立法會議員林健鋒大讚梁文廣勤力，熟悉社區，亦都得到市民支持。

梁文廣：冇得出戰唔會失望

被問到冇得出戰有冇失望，梁文廣話，經民聯今次補選有好多唔同角色參與，例如喺地區貢獻力量，幫助建制派認同理念嘅候選人當選，佢話唔會失望。

梁文廣又話，經民聯內部都有程序，等緊正式提名期，睇?𠵱家話積極考慮參選嘅人，最後係咪真係會報名，再決定係咪支持，佢會尊重經民聯黨領導層嘅決定，又話只要係建制派認同嘅人勝出，對佢嚟講已經係最大滿足。