【明報專訊】環境局?「大嘥鬼」宣傳公仔facebook專頁一直備受網民愛戴，唔少網民不時讚大嘥鬼緊貼時事抽水之餘不忘提大家減廢，不過大嘥鬼噚日圖文並茂宣傳高鐵香港段通車，話「如果只是去附近地方，會乘搭高速鐵路，既環保又滅碳」，結果引來逾200個「嬲嬲」，仲多過讚好。有網民形容高鐵「一早唔起更環保唔大嘥」，有人質疑呢篇係「維穩文」，但有網民表達同情，相信網頁管理員只係收到上司指令先要宣傳。

大嘥鬼喺帖文話：「高速鐵路係(?)網上有好多唔同嘅討論，鬼鬼有睇都好明白，但都想講多樣嘢畀大家知，高速鐵路嘅碳排放量只係飛機嘅十分之一，對比喺路面上行走嘅跨界巴士同喺高空排放廢氣嘅飛機，出行所產生嘅碳排放會比較低㗎。」大嘥鬼喺文末標註「只談碳排放」，有網民就形容大嘥鬼「戴晒頭盔」，相信宣傳高鐵都係迫不得已。