【明報專訊】時值農曆七月，消防處近日搵嚟擅長演靈異電影嘅藝人羅蘭拍攝短片《擊活の人心——靈異篇》，短片仲滲入一啲鬼片常見嘅視覺元素，「牛頭馬面」都有份，不過羅蘭姐今次唔係講鬼怪，而係以先驚慄後搞笑嘅形式，教導大家心肺復蘇急救方法，片段出街後大獲好評，兩日有逾8000人次觀看。

「任何仁」都可救人一命

故事講述「消記茶餐廳」一個外賣仔，到一棟氣氛恐怖?大廈送外賣時，被尾隨嘅羅蘭姐嚇到昏迷。此時風格突然變得輕鬆，羅蘭姐為咗教識一個全身藍色嘅「外星人」點樣救人，同「牛頭馬面」一齊用rap?形式講述心肺復蘇正確手勢，以及AED機(自動體外心臟去纖維性顫動機)使用要訣，佢哋最終救番外賣仔；而外星人其實叫「任何仁」，意指任何人都可以幫手救人一命。

短片為咗應節加入唔少視覺元素，包括幽暗燈光、「9413」門牌，同印有詭異提醒字句嘅外賣單等，當然唔少得羅蘭姐嘅經典拖長尾音聲線。羅蘭姐喺片尾宣傳消防處嘅「公眾人士使用除顫器課程」，佢話呢個課程嘅導師個個都有20幾年前線救護經驗，呼籲有興趣市民上網查詢。