【明報專訊】中大醫學院噚日宣布會同中大文物館合作，喺新學年效法美國耶魯大學醫學院，推出「文物觀賞課程」，教醫科生鑑賞文物館館藏。鑑賞畫作及瓷器同做醫生有咩關係呢？醫學院助理院長(常務)趙偉仁就話，鑑賞文物有助提升學生視覺分析、觸感敏銳度同表達能力，相信學生將來睇X光片都會細心啲、叻?。 3個小時嘅「文物觀賞課程」會喺新學年開放畀所有醫科生選修，文物館館長姚進莊話會係6至10人嘅小班教學，頭兩個鐘係文物鑑賞對談，由學生向教授描述文物呈現嘅線索，再發掘背後信息，其餘一個鐘會教學生將鑑賞技巧應用於醫學上。醫學院院長陳家亮話，醫科除咗係科學亦係人文科，「學醫等於學做人」，佢深信「望聞問切」喺科技主導嘅世代仍好重要，認為課程可以擴闊學生眼界之餘，同時訓練觀察力，提高診斷準確度。 趙偉仁本身亦有涉獵國畫藝術，師承嶺南派國畫大師趙少昂。趙偉仁14歲開始習畫，令佢容易掌握人體比例同分辨顏色，有助明白病人需要，同解讀X光片、內窺鏡影像，如早期腸癌只係內壁顏色有變，醫生通常會用白光內視鏡診斷，較難發現唔正常嘅血管，如果醫生顏色敏銳度高，可及早發現早期癌症。 姚進莊話耶魯大學20年前已為醫科生安排藝術鑑賞課程，醫學期刊Clinical Orthopaedics and Related Research近年亦發表一項研究，指無參加藝術欣賞課程嘅醫科生，喺描述皮膚疾病影像嘅測試上，表現不及有參加嘅學生。
|
| |
| |
;){kind=small}
;)
