【明報專訊】Emily平時都鍾意買衫，屋企都有幾多已經唔著但又唔捨得丟棄嘅「戰利品」，有組織就做咗一個有關港人囤物同購物習慣嘅調查，發現香港人屋企收埋唔少袋、鞋同T恤，例如有接近四成嘅受訪者屋企有21件或以上嘅T恤！ 和富社會企業喺今年4至5月調查港人嘅囤積物品同購物習慣，並由香港公開大學護理及健康學部分析，用問卷形式訪問咗1028個成人，發現有接近四成嘅受訪者屋企有21件或以上嘅T恤，四成以上受訪者有超過5個袋同背囊，兩成半人有超過10對鞋。調查仲顯示，有三成受訪者每個禮拜都會有1次以上買唔需要或者無計劃要買嘅嘢。 和富社會企業「簡．生活」籌委會主席馬家駉都話香港人消費文化盛行，所以要推動一下簡約生活。屋企放咗一大堆無用物品始終唔係咁好，所以「簡．生活」年尾就會搞換物活動，同埋請唔同嘅名人分享簡約生活嘅信息。
|
| |
| |
;)
