【明報專訊】港區人大代表羅范椒芬喺2012年特首選舉時，瞓身為梁振英助選，不經不覺明年好快又選特首，唔知羅太今次會唔會落場幫人做吓助選呢？羅太噚日點都唔肯答係咪支持梁振英或其他人做特首，亦唔肯評論CY做成點，咁究竟明年呢個時間，羅太打算瞓身助選，定係好似劉鳴煒咁食花生睇選舉？羅太笑住話自己會「退位讓賢」。

大家唔好誤會，其實羅太無講明唔幫CY，但佢就話𠵱家講特首選舉都係為時太早，但佢就有對明年工作嘅期望，原來羅太個仔今年5月就會結婚，羅太話可能明年已經有孫抱，自己可能要忙住湊孫呢！佢仲講笑話或者都要去上堂，學吓點樣湊小朋友。

雖然恨抱孫嘅心情已經擺晒上塊面度，但羅太話絕對唔會畀壓力個仔，囝囝年紀都唔細，佢肯結婚已經好開心喇！佢又透露個仔結婚唔會大排筵席，選擇喺外地行婚禮。