【明報專訊】全國政協前委員劉夢熊被裁定意圖妨礙司法公正罪成前5天，在辦公室接受本報獨家專訪，回顧3年間的官非纏身，以及與梁振英的恩怨情仇。劉坦言令他「最覺得自己睇錯人、做錯事」，是2012年5月21日與梁振英商討香港管治問題時，梁形容與香港泛民主派的關係是「敵我矛盾」。劉彷彿如夢初醒，終發現梁當初說的競選方針「只是一場大話」。
在說「歷史將判我無罪」前，劉夢熊處之泰然，還跟記者說笑可以開香檳慶祝。他繼續「清者自清」，字字鏗鏘道：「心情都係平常心囉，因為一向都係覺得清者自清，平生不作虧心事，半夜不怕鬼敲門。我相信香港法律係公正，亦都事實勝於雄辯。」
被問「政治炸彈」﹕適當時會講
妨礙司法公正案中公眾最關注的，是劉夢熊信中提及的「政治炸彈」。記者再三追問，劉未有正面回答：「總言之，『苟利國家生死以，豈因禍福避趨之』，為咗我哋國家改革開放的大局，為咗我哋一國兩制的健康發展，該做啲乜嘢，適當時候我一定會去做；該講啲乜嘢，適當時候我一定會去講。」
倘無「橫禍」 或遭港人唾棄
由東方明珠案到妨礙司法公正案，劉夢熊認為官非是人生最大困境：「我個心情不嬲都好平靜，因為我知道呢啲全部都係子虛烏有嘅嘢，所以呢3年嚟畀咗我寶貴嘅一課。」劉指「睇真邊個真朋友，邊個係假朋友」。從1973年「一條泳褲闖香江」以來，劉一路扶搖直上，但3年間官非纏身又無法連任政協，劉從未如此潦倒過，如今他患得患失：「反過來如果我無咗呢3年嘅橫禍，如果我好順利咁做咗(政協)常委，好順利咁做咗專委會副主任、入咗行會，咁我就變咗站喺喪盡人心嘅689呢邊，我可能會畀香港市民所唾棄，好似得意於一時，但會留下歷史的罵名同臭名。」從政之路有如三座大山，劉說至今仍有人游說他參選立法會，但案件未完，他暫不考慮。
2013年初，「頭號梁粉」劉夢熊因涉嫌詐騙東方明珠案被廉署拘捕，自此當劉在新聞版面出現時，梁振英亦難免會被提及。劉自命眼光獨到，敢作敢言，他說就連中聯辦主任助理陳山玲也稱他為「參謀長」，但他最終「投錯票箱撐錯老梁」。「我最上心嘅、最覺得自己睇錯人、做錯事呢，就係年2012年5月21日晚。」他說無法忘記當晚與梁飯局中，二人商討香港管治的問題。梁形容與泛民的關係是「敵我矛盾」，劉才發現，梁的競選方針只是一場大話：「咁你講和平外交政策嗰啲係假嘢囉！」
憶曾見面 唐只談美酒
劉夢熊說，當年面對梁振英與唐英年，是「狼與豬」的抉擇。劉曾與當年準備參選特首的唐英年見面，對方與他在飯局中飲紅酒，但只談佳餚美酒，唐甚至叮囑劉紅酒要在「16度飲就啱啱好」。劉一心寄望可在政治上為特首策謀獻計，遂決定將籌碼押在另一參選人梁振英身上：「撐佢其實就係基於當時的社會需要，對時代潮流的判斷。」2011年8月，劉已經高舉支持梁的旗幟，落力為梁製造輿論。
昔日戰友、判罪前夕的劉夢熊形容與梁振英的感情是「義氣駁兒戲」。劉憶述有次北上與中央人員見面，回港後向梁匯報，梁聽罷只回應「知道喇，唔該晒」，翌日劉從朋友口中得知梁當時亦身在北京，早對事情瞭如指掌。劉醒覺：「嘩，呢個人城府咁鬼深！你就同佢交心，佢就同你圍起重重鐵幕。」
明報記者 李穎欣
;){kind=small}
;){kind=small}
;)
