【明報專訊】立法會大會及財委會上演拉布戰，但臨近歲晚，唔少直選議員都要抽時間返社區，搞吓「蛇齋餅糉」、見吓街坊。公民黨陳家洛雖然宣布咗9月棄選，但都喺選區海怡擺檔，搵人幫街坊寫揮春，幫手嘅人包括書法了得嘅公民黨主席余若薇。同樣宣布唔參選嘅黨魁梁家傑，噚日返咗慈雲山同鑽石山幫街坊寫揮春。
田二少做「財辰」 Ann姐去女人街
新民黨田北辰就大陣仗，周六及周日一連兩日喺新西多個大商場設攤位，搞「賀年掛飾工作坊」親子活動，畀大家一齊製作賀年掛飾，而田二少就扮「財辰」娛賓。經民聯梁美芬就話，平日畀啲拉布派議員嘥晒啲時間，搞到佢做唔到地區工作，所以趁噚日唔使開會，大清早就落區向黃埔花園、石硤尾、紅磡灣街坊送暖拜早年，又向長者派賀年物品。
民建聯蔣麗芸就喺facebook上載短片，話近日去行旺角花園街及女人街，同商販代表傾偈，話商戶向佢反映，近期不但內地客減少，連外國遊客都唔多，搞到年近歲晚，呢兩條街人流都唔旺，話政府要諗方法刺激零售業。
;)
