【明報專訊】梁班子強調發展創新科技，雖然獲投資推廣署點名做「成功個案」嘅Uber被警方高調打擊，不過仍然有唔少外國初創企業想港府助一把。投資推廣署噚日上載短片講年輕創科人故事，其中科大畢業生陳浩然(圖右)幾年前去美國做交換生，與同學研發咗全球第一個集合指示燈、煞車燈同左右指揮燈嘅智能單車頭盔，結果喺美國成功集資後，就由投資推廣署協助返嚟香港設立公司。 呢個智能頭盔前後配備LED燈，用家可喺單車手柄上遙控控制燈號，減速時頭盔會亮起煞車燈，加強安全，頭盔今年3月投產。創業初期當然希望盡快搭通人脈，陳話投資推廣署邀請佢出席社交活動認識業界人士，又幫佢拍檔陳有運(圖左)申請投資簽證，而投資署就話署方嚟緊會致力宣傳，協助外國初創企業落戶香港。 (政府新聞網)
|
| |
| |
;)
