【明報專訊】嚟緊新一屆區議會有唔少新面孔，黃埔西區由「青年新政」鄺葆賢勝出，佢嘅隊友游蕙禎出戰隔籬選區黃埔東，就以300票之差不敵爭取連任嘅經民聯梁美芬。唔少游蕙禎嘅支持者好鬼失望，客貨車電召App平台「CALL4VAN」噚日就出咗個「調整收費通告」，話以後凡進入黃埔東嘅訂單，都要加收20元喎，理由係「過半黃埔東居民視力有問題」、「區內鼠患問題持續」。 想豁免要講明曾竭力「滅鼠」 「CALL4VAN」喺facebook公布「調整收費通告」，話鑑於最新數據「顯示過半黃埔東居民視力有問題」，同埋「區內鼠患問題持續」，所以凡進入黃埔東嘅訂單，都要加收20蚊「安全行車」及「消毒清潔費」，即日生效咁話。「CALL4VAN」仲話，如果要豁免收費，就要落單時講明曾經竭力「滅鼠」。而眾所周知，梁美芬就因為致力捉老鼠而有個「鼠王芬」花名。 「CALL4VAN」過往不時做「抽水」宣傳，創辦人Conrad Wu同Emily講，佢哋無份喺黃埔東投票，不過對呢區嘅戰果最唔滿意，「條氣唔順」之下就諗出呢個收費方法。 Conrad話，出咗通告後真係有黃埔東嘅人打去問係咪真係要加價，佢就話「你敢打來我就敢收(錢)」。有黃埔西選民就話好出力投咗畀鄺葆賢，咁有無得減價先？Conrad話都可以考慮吓。
|
| |
| |
;)
