【明報專訊】距離聖誕節仲有個幾月，但聖誕老人係要提前開工嘅，「國際聖誕老人運動會」港區選拔賽噚日舉行，參賽者要喺狂牛競技、聖誕粥競食、禮物層層疊、鐵人三項同歌舞大賽中一決高下，比賽同時又要展現自己嘅感染力同親和力。留意番，最終獲勝嘅戚曉傑「Santa Apple」喺5個項目都分別勝出，名副其實贏咗成條街！佢將會代表香港，11月中到瑞典北部小鎮耶利瓦勒，參加國際聖誕老人運動會。

比賽項目其實一啲都唔簡單，例如狂牛大賽要求參賽者坐喺狂牛上面保持平衡，但只可捉牛繩，唔可以掂牛身、牛角；粥競食大賽望落去好似幾輕鬆，但聖誕老人個個鬍鬚超級長，食起粥嚟都幾論盡。Emily仲以為聖誕老人係一份筍工，一年淨係返一日，但諗吓要孭咁多禮物爬煙囪，入屋後要快速砌靚啲禮物，交通工具仲要係原始鹿車，真係少啲體能都唔得，唔怪得入職要求咁高。