【明報專訊】早前有年輕女病人因得唔到合適嘅肺捐贈而去世，引起公眾討論香港嘅器官捐贈制度。民建聯立法會議員葛珮帆(EQ)噚日喺黨團會議，呼籲黨友簽器官捐贈卡身體力行，佢話黨友一呼百應，而原來立法會主席曾鈺成十幾年前已簽咗器官捐贈卡。 EQ話黨友響應齊簽 立法會大會噚日都有討論相關議題，EQ喺會議上話香港遺體器官捐贈者比率偏低，希望政府做多啲推廣工作。食物及衛生局長高永文回應話，政府未來會加強宣傳同增接觸點，冀社會可以移風易俗。 另外，高局長話，政府嚟緊會就捐贈者意願「遺囑化」，即立法規定器官捐贈證具類似遺囑嘅法律效力，及選擇唔參加(opt-out)捐贈器官兩種方案，諮詢專家同公眾意見，但承認政府對後者有保留，因為醫學界都希望器官捐贈係自願之舉，加上唔同國家推行opt-out方式會因為文化差異而有唔同成效，所以政府會做更多分析同調查。EQ話民建聯對「遺囑化」一致贊成，而對於opt-out，現時未有詳細討論，但認為呢個方式都值得研究。 葛珮帆將於區議會選舉出選頌安選區，對手有工黨葉榮。
|
| |
| |
;){kind=small}
;)
