【明報專訊】中大校長沈祖堯係大醫生、腸胃專家，佢話自己幫病人做結腸內窺鏡檢查做咗千百次，仲成日以專家口脗，同人講大腸內窺鏡安全、有效，且絕對無痛，但原來55歲嘅佢，自己反而無做檢查。 及至近月，佢都發現腸臟有問題，噚日變成病人，人生首次要接受麻醉。佢瞓喺手術牀上，終於體會病人「失去了自主權」嘅感受，仲同平凡人一樣，擔心過一睡不起，泛起了生與死嘅疑惑。 害羞驗腸 自吞膠囊內窺鏡檢查 沈校長噚日發表網誌。佢話以前成日叫50歲以上嘅人去驗腸，但自己「卻羞於請同事替我檢查大腸，也擔心萬分之一機會出現併發症」。沈校長於是諗到方法，吞下膠囊內窺鏡檢查大腸，發現腸內有異物。佢話諗咗兩個月，終於下決心在噚日做大腸內窺鏡檢查同埋瘜肉切除手術。 啟發「充實過每一天」 佢話做咗多年醫生，噚日係第一次接受麻醉手術，諗番起都感慨良多。佢話近日湧現好多想法，話假如醒唔過來會點算好？事件令佢重新審視自己嘅價值觀。佢又話，大學一位資深教授近期無意中被診斷出患癌，另一個唔食煙嘅醫學院同事就患上肺癌，年紀只大佢一年。 沈校長手術順利完成，人生觀改變咗，話向自己承諾：「充實地過每一天。把每天都看成是人生的最後一天。」
|
| |
| |
;){kind=small}
;)
