【明報專訊】民建聯蔣麗芸(Ann)出名火爆忍唔到口，但佢作為前輩，都話要向該黨年輕新任主席李慧琼(Starry)學習，佢話Starry脾氣好，唔容易畀人激嬲，唔開心都仍會微笑，叫Starry教佢點樣可以EQ高啲。Starry就話其實無秘訣㗎，只因為「我天生真係由細到大都好喜歡笑」。

Starry係曾鈺成悉心栽培嘅愛徒，Ann姐話，外面有人質疑Starry掂唔掂，但Ann姐話從旁觀察，Starry做事好淡定，仲成日好開心咁笑。Ann姐話自己成日畀人激到好嬲，所以要向Starry學習一下，而Starry就話自己少發脾氣、少同人鬧交，仲爆咗黎明式金句﹕「如果有一日我真係好嬲嘅話，咁就真係好嬲，因為我極少好嬲！」

李：老公撐從政 幫手兼母職

談到家庭，Starry話囡囡都有投訴佢唔陪自己，所以佢一定會劃出時間陪家人。一向好少提老公嘅Starry，話老公都支持佢從政，支持係好具體嘅，就係幫手兼母職，好似出席家長日、參加課外活動、帶囡囡去游水打波，主力都係老公做，咁佢先可以出去打拼。