教防「政改大騙案」
公民黨拍片扮警訊
[2014.08.29] 發表
【明報專訊】政改討論中，政府同建制派都呼籲大家「袋住先」，即使方案唔完美，都應該先行一步咁話，但有泛民就唔係咁諗，公民黨就拍短片《公民警訊》，呼籲市民提防「袋住先」，話呢個係世紀大騙案。片段中，公民黨黨魁梁家傑就模仿警方，講出「騙案」特點，佢話通常騙徒都會同人扮有商有量，但其實係有佢講、無你講，又話如果你袋咗，就會發現自己受騙喎。
該黨陳淑莊(Tanya)同楊岳橋就模擬騙案，話說楊岳橋好口渴想買蒸餾水飲，但老闆娘Tanya就話無，得其他水，同樣都係好嘢，包括加咗三聚氰胺嘅「機構提名水」、加咗孔雀石綠嘅「集體意志水」，同有蘇丹紅嘅「愛國愛港水」，全部都係經過「中央處理」，Tanya話可以唔收錢，又話就算有雜質，楊岳橋都應該袋住先，又問大家﹕「有水，真係唔飲？」
梁家傑話，政府推政改用咗好多藉口呼籲大家袋住先，但佢最希望大家一齊爭取符合國際標準嘅普選。片段最後，幾個演員一齊話「真普選，無篩選，企硬，take假嘢，衰硬！」
更多港聞
【明報專訊】清華大學法律學院院長王振民噚日中午去咗外國記者會午餐會，講白皮書同政改問題，前基本法草委、民主黨創黨主席李柱銘，民主黨李永達及南...
詳情
【明報專訊】傳統名校香港華仁書院同九龍華仁書院今年分別95同90周年校慶，今年校慶校方會舉行4項活動慶祝，並想籌6000萬元畀兩間華仁繼續行...
詳情
相關新聞
