【Emily】29海外遊樂設施 友邦嘉年華回歸中環

「友邦嘉年華」噚日開始喺中環海濱活動空間舉行，現場會有29個來自海外嘅遊樂設施，仲有打卡景點、餐飲攤位。（朱安妮攝）

【明報專訊】友邦嘉年華自2019年後再次喺中環海濱舉辦，由噚日開始到下年2月25日，橫跨聖誕節、新年同農曆新年多個節慶。嘉年華有29個來自海外嘅遊樂設施及30個攤位遊戲。網上門票分為非高峰、普通及高峰時段，每人140元至160元，包括10枚代幣，小童及身心障礙者每人95元至110元，包7枚代幣，另外可在網上預先購買代幣。

今年仲有不同現場表演，包括4年後再來港嘅Gandeys Circus所製作嘅雜技表演，一周7日、每天最多4場表演，每場65分鐘；票價按時段、座位，每人150元至500元。下月亦會有合共5日嘅音樂會，表演嘉賓有流行樂隊Dear Jane、首次以個人身分喺香港演出嘅Marz23等，今日開始預先向喺大會網頁註冊嘅訪客發售，聽日(23日)向公眾發售。