【明報專訊】有得玩facebook嘅中央電視台，前日喺「CCTV中文」fb專頁出咗一輯圖，讚揚香港警察，但就畀網媒質疑「偷相」、未經許可下攞佢哋嘅相嚟用，仲話央視揑造事實，「造成有關攝影師精神困擾」，嚴正要求央視將照片下架、發文更正內容，並賠償攝影師。

央視輯圖以「沒有從天而降的英雄，祇有挺身而出的凡人」為主題，分別話香港警察都係人哋嘅爸爸、老公同仔，都會掛住親人，其中一幅就話警察捱夜加班，「一個飯盒就當晚餐」，引發網上唔少討論。有網民話好多香港打工仔OT都係食飯盒，反而無警察咁好有超時補水；唔少網民亦問，唔食一個飯盒，唔通食幾個先叫晚餐？

兩警吸催淚相片 話係加班捱飯盒

fb專頁「社媒」其後發帖，並喺CCTV中文呢個帖文留言，話CCTV中文未經許可，用咗佢哋攝影師嘅照片同揑造事實，對攝影師中立專業形象造成負面影響，「更造成有關攝影師精神困擾」。社媒批評，CCTV中文將兩個警員吸入催淚彈嘅內容，誤導讀者理解為警察捱夜加班食飯盒苦况，對CCTV中文唔道德、唔專業行為深表遺憾，嚴正要求下架相關照片同發文更正，並向攝影師賠償，強調保留追究權利。