【明報專訊】聖誕就到，近日唔少店舖減價吸引消費，立法會紀念品店亦做緊聖誕新年節日推廣，好多紀念品都有特別優惠，仲有好多款式揀，包括「我要做議員」故事書同教育遊戲「建立我們喜愛的社區」。前者係用生動嘅方式畀小朋友認識立法會工作，鼓勵關注公共事務；後者就係一個遊戲，小朋友可以搵出遊戲內頁圖畫中嘅「違法」活動，貼上相應嘅「良好行為」貼紙糾正，建立美好社區。

近年立法會提倡環保，唔講唔知原來立法會有好多環保紀念品，包括環保袋、保溫水樽、保溫杯同木製筷子湯匙套裝等。如果大家想做環保小先鋒，可以考慮吓「綠色生活禮物包」，當中有齊多款立法會嘅環保用品。