【明報專訊】民主黨許智峯噚日喺立法會大會上提出有關「調查反修例運動」嘅口頭質詢，不過喺佢讀出質詢內容時用上「反送中運動」字眼。民建聯何俊賢提出規程問題，指許智峯無跟住口頭質詢草擬本嘅字眼讀，認為係「搞小動作」，要求梁君彥裁決。許智峯反駁，「反送中」同「反修例」都係市民理解嘅字眼，叫何俊賢唔好咬文嚼字。梁君彥話，如果許智峯唔跟草擬本字眼讀，就唔畀佢提。民主黨涂謹申更因事件被主席逐出會議室。 許智峯當時話佢可以讀多次草擬本，但就請其他人唔好咬文嚼字；梁君彥話呢個唔係咬文嚼字，議員要原原本本去讀，否則答案就會唔同。許智峯即時修正：「反送中運動，我所講嘅即係等於反修例運動。」梁君彥要求許坐低，隨即想開始下一條口頭質詢，涂謹申隨即衝出去批評梁君彥「離晒譜」，結果被梁要求離開會議廳，糾纏間梁君彥暫停會議。 涂謹申轟主席被逐 復會後，梁君彥話暫停會議期間同許智峯會面，對方話明白佢要求，請求再有機會讀出口頭質詢。梁強調今次係酌情容許，之後許智峯跟草擬本讀出口頭質詢。 許智峯參選區議會中環選區，對手係黃鐘蔚；涂謹申係奧運選區候選人，對手為李家軒。 (小啟：是日稿擠，創科線暫停一天。編輯部)
|
| |
| |
