【明報專訊】政府喺10月4日引用《緊急情况規例條例》訂立《禁止蒙面規例》，呢條係「附屬法例」，政府用「先訂立後審議」形式處理，法例喺10月16日已提交立法會大會省覽，審議期得4周，即係今個星期三已到期。《禁蒙面法》小組委員會主席、民建聯黃定光(象哥)話原本打算喺前日嘅立法會大會提出延展審議期，不過就因為時間所限提出唔到。 話原本想延展審議期 象哥同Emily講，佢打算喺下星期一(18日)再開會，雖然改唔到草案嘅內容，但都想保安局等官員，到立法會向議員解釋番草案嘅條文。 想保安局等官員解釋草案條文 小組委員會早前已經開咗5次會，包括一次公聽會。象哥話，之前會議仲係講緊立法原意同目的，仲未入到條文去「逐字審議」。佢話原本提出延展後，會有多3個星期可以審議草案，雖然𠵱家提出唔到延展，改唔到草案內容，但官員解釋條文都係重要。
|
| |
| |
