【明報專訊】社會持續出現衝突，唔少活動因此取消，公益金噚日宣布，因應現時社會狀况同預期交通情况，取消原定後日(17號)舉行嘅「新界區百萬行—香園圍公路」。至於樂施會前日宣布取消原定今日展開嘅毅行者，唔少參加者練習多時，相信對取消決定都感到失望，毅行者常客蔡東豪就決定喺今日照舊行100公里，用呢個方式支持毅行者。 樂施會因應近日社會同交通運輸情况，同為咗保護毅行者、支援隊伍同義工嘅安全，決定取消今年嘅毅行者。蔡東豪噚日就喺facebook話，好多謝樂施會毅行者小組嘅努力，知道佢哋奮鬥到最後一刻先宣布取消。佢話作為毅行者，「最擅長介入這個城市的方法，是用雙腳行出信念」。已經參加毅行者19年嘅佢話今日會照舊行，形容「一件事，年年做，做了19年，毅行者早已成為了我生命中的重心」。 大帽山茶水亭蓮姐：今通宵營業 經常為行山客送暖嘅大帽山茶水亭嘅蓮姐都話，知道大家好畀心機練習，好想完成一個「毅行者」，所以茶水亭今晚通宵營業，聽日開到凌晨兩點，做毅行者最強後盾、最大支援，「大家一定要行去大帽山茶水亭打卡呀」。
|
| |
| |
