【Emily】林鄭現身青少年軍結業禮 話會盡力支持青年健康成長

特首林鄭月娥（左）同中聯辦主任王志民（右）噚日出席青少年軍事夏令營結業典禮，兩人喺台上有傾有講，仲一齊睇手機，唔知王志民有咩信息同林太分享呢？（曾憲宗攝）

【明報專訊】第15屆「香港青少年軍事夏令營」結業典禮噚日早上舉行，典禮邀請咗好多重量級嘉賓，包括自6月反修例風波以來，極少出席公開活動嘅特首林鄭月娥。

無接受記者訪問

林鄭無接受記者訪問就離開，佢喺典禮致辭時話，香港受惠於國家高速發展帶嚟嘅機遇，寄語同學目光放遠，留心國家發展，以開放嘅態度接觸唔同人同事等，將來為香港、國家和世界嘅發展貢獻。

林太又話青年係香港發展嘅動力，會盡力支持青年健康成長，又希望參加青少年軍嘅同學仔，將體會同學習成果帶番學校，同其他人分享，令更多人參與。

喺呢半個月裏面，同學仔參觀過解放軍海軍空軍基地，坐過軍艦裝甲車，又試過徒步行軍步操訓練，仲學埋岳家拳，Emily噚日見佢哋都耍得好架勢。同學仔話雖然好充實，但真係好攰。中二嘅學員向琳娜話，一直都好渴望做軍人，但參加完先知比想像中辛苦好多，佢特別提到步操訓練時要練到行唔郁為止，仲話好彩有齊全嘅醫療設備。

學員叫林鄭快啲見學生

對於最近反修例風波引發警民衝突，中四嘅翁智謙就覺得警察示威者都有唔啱，唔希望再有示威活動，又叫林鄭快啲見學生。