【Emily】張建宗「竄紅」 網誌fb官網轉載

【明報專訊】政務司長張建宗上周五承認警方處理7．21元朗襲擊事件同市民期望有落差，仲道埋歉，引起警隊唔少人公開表示不滿，張建宗之後就補飛話「絕對支持同衷心感謝警隊執法工作，會盡快同相關警務人員協會會面」。佢噚日發表網誌，但就完全無提及任何同警隊有關嘅內容，主要講天文台，雖然唔係評論目前形勢，但網誌獲facebook香港官方專頁發文轉載，唔少網民話佢鋪路做特首。

網民話鋪路做特首

講番張建宗篇網誌，佢話早前同4個參加咗「與香港同行」計劃嘅中學生，同埋3個參加政府主辦暑期實習計劃嘅大學生參觀天文台。張建宗話，天文台走過百年歲月，為香港服務之餘，亦喺世界氣象工作同科技應用方面取得國際領先地位，成就得來不易。

佢提到天文台長岑智明今年6月獲選為世界氣象組織嘅「天氣、氣候、水及相關環境服務與應用委員會」其中一個聯合副主席，突顯佢同天文台嘅貢獻得到國際社會認同，係港人驕傲。

話沉着應對 風雨後總有晴天

司長喺文章尾段分享感受，話香港喺國際層面唔同範疇享有領先地位，令港人引以為傲，令佢聯想到天氣縱然陰晴不定，遇到風浪，只要沉着應對，再大風雨過後總會有晴天。