【Emily】反修例祈禱會 夏志誠微笑擊退質疑

【明報專訊】噚日下晝有天主教團體喺黃大仙舉行主題係「反送中運動」嘅政治情感分享兼祈禱聚會，由香港教區輔理主教夏志誠主持。對於有人覺得祈禱會係宗教活動，主題唔應該寫上「反送中運動」，夏志誠微笑住反問：「唔咁寫啲人又點知聚會關於啲咩呢？」佢又話今次聚會係非公開活動，所以唔接受進一步訪問。

參加教友李小姐話見到社會撕裂同不公義情况，加上政府對人命嘅冷漠、完全無回應訴求，「對爛咗嘅嘢咁緊張，但對喪失生命嘅青少年就漠不關心」，所以內心一直好辛苦好痛，「我自己個心都撕裂啦」。佢話雖然喺祈禱會搵唔到應該點樣再行落去嘅方法，但起碼得到內心平安，會將時間同歷史嘅主宰交託畀神，自己會繼續祈禱同做認為公義嘅事。

點評林鄭 教友：大家都係罪人

至於點睇教友林鄭月娥，李小姐話每人喺每一刻嘅選擇都唔同，只能為佢祈禱。教友張先生就話大家都係「罪人」，會為彼此祈禱，因為教會係一班「罪人」聚集互相勉勵同祈禱，最終目標都係力臻肖似基督。