【明報專訊】民建聯立法會議員葛珮帆(EQ)經常為紀律部隊發聲，噚日佢同傳媒新春聚會時，除咗佢喺沙田、西貢支部嘅黨友外，更加叫齊多個紀律部隊嘅工會一齊出席，借呢個機會，再講各紀律部隊職方向特首提出嘅四大訴求，多個紀律部隊代表發言時，都先多謝EQ為佢哋爭取福利同發聲咁話。

重申四大訴求 工會多謝爭取

EQ噚日邀請咗包括警務處、消防處及救護、海關、懲教署、入境事務處及政府飛行服務隊嘅紀律部隊職方代表，一齊同傳媒聚會，除咗恭賀說話，唔少得講吓佢哋嘅訴求，包括立即啟動每6年進行一次職系架構檢討；為紀律部隊人員購買私人醫療保險，以紓緩公營醫療負擔；訂立侮辱公職人員罪；以及延長紀律部隊人員嘅退休年齡，令2000年或之前入職嘅同事，都可以睇齊喺60歲退休。

各個代表亦各自講吓訴求，好似懲教人員總工會主席王美心就話，懲教處至今仲未實行到5天工作周，希望盡快落實；警務督察協會副主席曾昭顯就希望政府可以修改現有公安條例，令佢哋更易執法，強調修例係要保障市民。