【明報專訊】立法會補選候選人宣傳攻勢不斷，有網民前晚喺facebook群組貼圖，話收到工聯會鄧家彪競選新界東嘅郵寄宣傳單張，但信件無貼郵票，結果由於郵費不足，郵局要求收件人繳交4蚊郵資及罰款，而信件內容講到佢自稱「選情嚴峻」，令網民質疑唔通嚴峻到連郵票都無？工聯會噚日喺fb向受影響會員表示歉意，話佢哋可以致電工聯會，工聯會會盡快跟進。

阿彪﹕個別義工無貼郵票

阿彪就同Emily講，以佢所知事件係個別義工一時大意無貼郵票，相信無寄出大量無郵票單張。單張內文由工聯會會長林淑儀所寫，收件者係會員，單張印有「選情嚴峻 緊急呼籲」大字，叫會員「全家總動員 齊投鄧家彪」。呢名網民噚日喺群組貼圖，同時徵求其他人意見，問「去郵局拎信前，可唔可以睇左(咗)係咩信先比(畀)罰款？」阿彪對手、新民主同盟范國威就喺fb改圖，諷刺阿彪「罰過大家4蚊，大家就實記得我係4號(阿彪候選人號碼)啦」，又攞佢「跨越共享」嘅選舉口號嚟開玩笑，話其實係「郵費共享」。新界東其他候選人包括黃成智、陳玉娥、方國珊同趙佩玉。