兩籤對調 莫錦貴失眠 不認為有調亂 苦思改善秩序
[2018.02.21] 發表
【明報專訊】鄉議局主席劉業強同沙田鄉事委員會副主席李志麒，大年初二(17日)按傳統分別為香港同沙田求籤，發生兩籤對調嘅烏龍事件。沙田鄉事委員會主席莫錦貴噚日出席新春團拜時話，呢件事搞到佢成晚失眠，諗點搞番好求籤儀式嗰陣嘅秩序，又自責點解唔管理得好啲，不過就仍然唔覺得香港同沙田兩支籤有調亂到，接受呢個係神明安排。
佢話，當日「只係有混亂」，但嚟緊會開會傾下將來可能要由求籤者自己執番求出嘅籤，或搵專人睇實。佢又話，想搵著名堪輿師傅、96歲高齡嘅蔡伯勵教呢啲程序點做先啱。
指重睇片段「睇唔到問題」
莫錦貴強調無諗過追究同求證，因為事件已經發生，無造成不快或社會動盪，當日負責嘅唔係廟祝，唔知兩籤嘅分別，唔係特登調轉籤。
佢仲話，有重睇求籤片段，睇唔到問題，係𠵱家啲科學太先進，眼見都要諗清楚係咪真實。
同場嘅沙田民政事務專員陳婉雯話，自己當日都在場，讚沙田鄉委會已經好落力準備儀式，而求籤過程都完全透明。佢又希望香港人、沙田人多一分包容，因為唔係用人工智能，用人手始終無完美，希望汲收經驗後，下年會有更完美嘅祈福。
更多港聞
【明報專訊】政府場地幾乎都有自動飲品售賣機，噚日起停售1公升以下嘅膠樽裝飲用水，但Emily發現唔少場地如界限街運動場館、灣仔政府大樓等仍然...
詳情
【明報專訊】《財政預算案》下周三發表，唔同團體都向財政司長陳茂波交建議，香港中華總商會日前亦都向政府提交咗意見書，部分建議要求政府制訂政策協...
詳情
相關新聞
