【明報專訊】泛民、建制除咗喺議會、地區鬥不停，最近「戰場」更轉到網上世界，民建聯及民主黨近年都銳意發展網絡平台，近日更不時喺facebook互相抽水揶揄一番。民主黨近日就出咗兩個post，擺明窒民建聯嘅立法會議員，其中一個上載一幅漫畫，話「如何迴避學歷問題」，揶揄民建聯柯創盛未能提供學歷證明，民主黨林卓廷就建議佢拎證書出嚟，唔使遮遮掩掩。

「干諾道東」vs.自我流會

而前日民主黨fb就有另一個post，揶揄民建聯陳恒鑌早前喺特別財委會向政府提出書面質詢，問及「干諾道東」嘅車速資料，但事實上香港並無干諾道東呢條路嘅。民主黨個post笑言可能民建聯好想解決香港土地問題，「所以曲線咁叫政府起多條路」。呢兩個post都吸咗唔少like同share。

至於民建聯，近日亦有唔少fb帖文批評民主派，好似上星期四立法會流會，當時正打算討論由公民黨郭家麒提出有關政改嘅動議，由於郭醫生遲到，所以林卓廷就幫手點人數，諗住拖一拖時間令醫生趕及返回議事堂，點知最終搞到流會。民建聯就出post窒公民黨「自己動議自己流」，皆因當時公民黨竟全部缺席會議。特首選舉後，民建聯亦曾喺fb出post質疑「民主300+」唔係投票予提倡全民退保、唔要8．31框架嘅胡國興，批評泛民「口口聲聲不要8．31，要全民退保，結果卻全投無論政綱及理念都同佢哋背道而馳嘅曾俊華」。