【明報專訊】支聯會去年關閉喺尖沙嘴嘅六四紀念館後，一直想另覓永久選址，而喺未搵到之前，支聯會主席何俊仁話，本月尾會喺石硤尾賽馬會創意藝術中心(JCCAC)以臨時展覽方式，舉辦為期兩個月嘅六四展覽。仁哥就話，佢哋唔會放棄搵合適地點設立永久紀念館。 今年喺六四事件28周年，支聯會噚日喺尖沙嘴鐘樓旁舉行清明節獻花活動，悼念六四事件死難者。支聯會喺現場搭建咗紀念碑同民主女神像，有市民就喺紀念碑前致意同獻花。 被問到香港選出新特首對六四晚會人數有無影響，仁哥話香港民主發展最大障礙係來自北京，而今次選舉令大家明白中國走向民主係十分重要。佢又相信今年六四集會仍會有唔少人參與。去年維園六四燭光集會人數，大會公布有12.5萬人出席，為2009年以來新低。
|
| |
| |
;){kind=small}
