【明報專訊】作為人大代表嘅新民黨田北辰不時都有一啲創意構想，佢今次開人大會議時提咗新建議，叫香港同廣東省加強合作，但唔係搞經濟或自貿區，而係一齊搞骨灰龕場！

稱神州搵地創雙贏

田二少話，港府雖然喺18區物色咗24幅選址打算起龕場，但都唔知搞到幾時，既然咁，不如北望神州，搵啲未經開發嘅土地設龕場。但係點解內地要撥地畀港人安葬先？田二少就話呢個係兩家「有着數」嘅建議。

佢話，其實內地人對優質管理嘅殯葬業需求甚殷，過往亦不時有報道內地墓園管理不善，因此佢提出內地撥地，然後交畀香港非牟利團體管理。

佢提議可將龕位分兩半，一半供港人使用，收取香港政府龕位價格，另一半就免費給予內地政府分配畀內地人，由港方負責日常管理工作及開支。