【明報專訊】政制及內地事務局長譚志源噚日落區派單張宣傳政改，其實政府嘅盟友民建聯，自己都為政改設計咗份單張，稍後亦會落區派發，又會叫該黨會務顧問梁愛詩同譚惠珠落區同市民講政改。民建聯嘅政改單張叫做「普選特首知多D」，內容當然政治正確，包括表明公民提名「梗係唔妥」。 呢份單張用漫畫答問形式講解普選，好似中央係普選特首上有咩角色，民建聯就解釋有兩個，包括普選方案要中央批准，以及選出嚟嘅特首要中央任命。至於民主派中人要求嘅公民提名或者政黨提名有咩唔妥，單張就講明「梗係唔妥」，因為《基本法》話明要由提名委員會提名，再經普選產生，所以其他提名方案都無法律依據喎。 講佔中：千祈唔好做呀！ 建制派反對佔領中環，民記單張當然亦有呼籲，話唔需要佔中都已經可以有普選，因為人大常委會已經話咗可以，仲話「搞佔領中環係犯法行為，千祈唔好做呀！」
|
| |
| |
;){kind=small}
