【Emily】民記攻網 敗選者轉做KOL

民建聯培訓區選落敗者做KOL，其中一個係立法會議員周浩鼎，佢個YouTube頻道唔止談論本地政局，仲有國際大局分析，例如分析美國總統特朗普講話。（YouTube截圖）

【明報專訊】民建聯大批成員喺區選落敗，早前話為佢哋搵緊落腳點，解決生計問題，但一直未公布方案。原來民記計劃培訓部分落選者做網上「KOL(意見領袖)」，拍片做「YouTuber」加強網絡戰。

周浩鼎YouTube頻道 訂閱昨未過百

民建聯副主席陳學鋒話，呢個做法可以幫落選黨友搵啲嘢做，有平台繼續面向公眾，亦都係一個繼續訓練佢哋議政能力、面對鏡頭嘅機會。陳學鋒話若果做得好，黨友仲可以靠做「YouTuber」搵到收入。

民記暫時培訓緊3個KOL，包括喺東涌南落敗嘅周浩鼎、西營盤落敗嘅劉天正、愛群區落敗嘅穆家駿，佢哋喺YouTube都有自己嘅頻道。周浩鼎頻道嘅影片大部分係影住佢坐定定論政，但題材就唔係局限本地政治，仲有分析美國總統特朗普「講話玄機」；穆家駿本身係通識科教師，佢搵嚟同業對談教育局係咪可以取消教師資格等問題；劉天正就拍片監察區選對手黃永志。暫時周浩鼎同劉天正頻道嘅訂閱人數都唔超過100個，穆家駿頻道就有105個訂閱者。

陳學鋒話，民記嘅網絡宣傳團隊一開始會教佢哋拍片技巧，例如點樣打燈、剪片等等，之後KOL就要自己搞掂。雖然冇咗咁多議席，少咗資源，但陳學鋒話民記仍然考慮緊加人手做網絡宣傳。

更多港聞

【Emily】何栢良變sticker 籲做好防疫工作

【明報專訊】港人關注武漢肺炎疫情，醫學界亦呼籲大家做好防疫工作。港大感染及傳染病中心總監何栢良用自己嘅嘜頭整咗套好盞鬼嘅WhatsApp貼紙... 詳情

【Emily】特首答問會 建制率先飲7啖湯

【明報專訊】特首林鄭月娥聽日（周四）到立法會出席個半小時答問會，立會主席梁君彥喺10月《施政報告》特首答問會話過，按《議事規則》，過往發言次... 詳情

【Emily】開會一個鐘先計出席 油尖旺區會杜絕1分鐘議員

【明報專訊】新人事新作風，除咗警方執法問題，今屆唔少新區議員強調要革新區政。油尖旺區議會噚日召開內務會議，區議員李傲然（Owan）透露，會議... 詳情

【Emily】粵劇加韓流，有無得諗？ 區議員倡推粵劇防彈少年團

【明報專訊】今屆區議員唔少都係年輕人，自然較關注年輕人議題。話說噚日觀塘區議會討論今年1至3月撥款事宜，其間區議員鄧威文就話，賀歲粵劇撥款開... 詳情

【Emily】換新鈔封利巿 圍板匯豐畀人圍

【明報專訊】下星期六就係農曆新年，發鈔銀行噚日開始有新鈔供巿民兌換封利巿。旺角匯豐銀行雖然早前畀人破壞，圍起白色圍板，但噚日一早仍然有大批市... 詳情