【明報專訊】中國航空母艦「遼寧號」聽日起訪港5日，解放軍日前公開派2000張參觀券，另向特定團體發放1600張，可謂一票難求。貴為港區人大代表嘅立法會議員馬逢國，原來都攞唔到飛，咁有咩解決辦法？佢就話「問緊西環」。 自認係軍事迷嘅馬逢國，笑言唔少朋友都以為佢有飛，結果「人追到我瘦，我追到人瘦」。佢話想登艦影相「打卡」，亦關心記者攞唔攞到飛，但有記者就提醒呢次參觀係唔准拍攝嘅。 另一邊廂，工聯會立法會議員黃國健(KK)就獲邀參觀，但佢話唔清楚自己以咩身分獲邀。行過20年船嘅KK自謙「大鄉里入城」，上到艦乜都想睇，唔知佢係咪有份行船情意結，佢話最想睇嘅係艦隻內部渦輪結構，而艦上戰機亦係佢目標之一。
|
| |
| |
