曾鈺成大談「不准連任」

[2015.10.27] 發表

【明報專訊】仲有大約一年半時間就係2017年特首選舉，大家都關注梁振英(CY)會唔會尋求連任，結果係點到時先知，但立法會主席曾鈺成噚日喺報章專欄撰文，就以〈不准連任〉為題，其實內文係講吓其他國家嘅選舉制度，但標題呢四個字就已經令一眾讀者有無限猜想。

引大使「防獨裁者」言論

曾鈺成喺《am730》撰文，講國家元首或政府首長任期及連任與否對施政有乜嘢影響。佢話日前同一個訪港嘅墨西哥外交大使會面，談起任期問題，對方話墨西哥憲法規定總統只能出任一屆(6年)，旨在防止好似迪亞斯(Porfirio Diaz)呢啲獨裁者再出現。

佢引述對方話，只能做6年唔會令施政流於短視，仲將美國總統做比較，美國總統4年一任，可以連任一次，即係任期最長8年，但美國總統在任第4年都要做競選活動，而到第二屆嘅最後一年，喺下任總統當選後，在任嗰個就會變成跛腳鴨，所以實際可以履行職務嘅時間只有6年多啲。

對比之下，墨西哥總統只可以做一屆，就唔使花時間做競選連任嘅工作，6年任期內大部分時間都可以正常地履行職務，落實政綱。曾鈺成又引述該大使話，總統只做一屆可減少受民粹主義影響，但曾鈺成形容呢樣正係「官到無求膽自大」，但喺另一角度睇，會削弱人民監督總統嘅權力。

更多港聞