【Emily】與何君堯再聯手「發炮」 質疑削4職位唔夠 葉劉：港台再減啲人 地方就唔迫
[2025.04.12] 發表
【明報專訊】立法會財委會噚日開會審議政府部門開支，新民黨主席葉劉淑儀同議員何君堯再次「聯手」向香港電台發炮，仲拎鳳凰衛視同港台對比，話前者製作仲好睇。葉太質疑港台人手多，「以前港台想建新大廈，因為擠迫，你減多啲人就無咁擠迫」。港台喺會上捱打，商經局長丘應樺就話聽到議員清晰意見，稍後會同港台研究一下，再同議員溝通。
葉太同何君堯月初喺立法會大會嘅口頭質詢環節已分別炮轟港台。葉太噚日話，港台有754個員工，2025/26年度開支超過15億元，只計劃削減4個職位，而港台電視有5個頻道，當中3個轉播中央台等節目，仲會買片播放，質疑節目主任人手係咪可以減啲。
廣播處長：人手唔多 再研究削
廣播處長關婉儀回應時間唔算多，佢話今年會減少兩個文書助理、一個節目助理及一個技工，會再研究削職位，稍後會向政策局提交削減方案，仲話「始終人手都唔多，會盡量睇住精簡人手，確保資源用得其所」。
葉太一聽到「人手唔多」即面露不悅，話港台有754個人手都唔少，再減多啲人就唔會再話辦公室擠迫。葉太又話，鳳凰衛視有拍短片宣傳香港，問點解港台無拍？
何君堯其後再加一把，問港台點解喺2020年開支10.8億元，今年升至15.5億元，加幅50％。佢話鳳凰衛視係上市公司，全年蝕3.18億元，但口碑好、內容豐富，港台用咗15億元但無人睇，錢如同丟入海，叫商經局諗下港台點樣運用資源。
更多港聞
【Emily】大專生拍港靚景 外交公署短片賽奪冠
【明報專訊】外交部駐港特派員公署舉辦嘅第三屆「我的香港故事」英文短視頻大賽噚日頒獎，冠軍由保安局青少年制服團隊領袖論壇4個大專成員奪得，作品... 詳情
【Emily】叮叮教道路安全 「唔睇鷺」「亂入猿」做壞榜樣
【明報專訊】香港電車噚日開始「叮叮道路安全大行動」，仲設計咗「叮叮貓」做交通安全大使，同埋「唔睇鷺」及「亂入猿」兩個壞榜樣做反面教材。 ... 詳情相關新聞
