【Emily】大專生拍港靚景 外交公署短片賽奪冠
[2025.04.12] 發表
【明報專訊】外交部駐港特派員公署舉辦嘅第三屆「我的香港故事」英文短視頻大賽噚日頒獎，冠軍由保安局青少年制服團隊領袖論壇4個大專成員奪得，作品《快閃香港360》講述佢哋兩日內行咗7萬步，幾乎去晒西高山、彩虹邨、文武廟等香港著名景點。成員之一Giselle形容條片係一封「畀香港嘅情書」，希望觀眾睇完可以感受香港嘅靚。
團隊話當時每朝6點出發，午夜12點收隊，最深刻係有日登上西高山頂睇日落，「拍咗成日嘢好攰行落山，望住個維港，好似望住一個好繁忙嘅城市慢慢變番靜默，個轉變真係好感觸、好靚」。
至於亞軍之一嘅油蔴地街坊會學校，成員幾乎都係非華裔學生，條片記錄佢哋喺香港生活嘅點滴同第一次去內地交流。菲律賓裔嘅小六生Erin話最鍾意香港美食，尤其係燒賣同小籠包，希望將來可以繼續留港，完成歌手夢。
上屆大會收到近百份投稿，今年就話唔方便透露數字。外交公署副特派專員潘雲東提到，十強作品放咗喺公署facebook，至今有超過700萬次觀看，讚揚參加者有才華同創意。
更多港聞
【Emily】叮叮教道路安全 「唔睇鷺」「亂入猿」做壞榜樣
【明報專訊】香港電車噚日開始「叮叮道路安全大行動」，仲設計咗「叮叮貓」做交通安全大使，同埋「唔睇鷺」及「亂入猿」兩個壞榜樣做反面教材。 ... 詳情相關新聞
