【Emily】迪士尼Halloween今開鑼 有惡人舞會
[2023.09.16] 發表
【明報專訊】「香港夜繽紛」其中一項焦點活動就係兩大主題樂園嘅萬聖節活動，香港迪士尼樂園噚日就公布由今日到10月31日推出「Disney Halloween Time」，入園除咗可以睇得獎歌舞表演「惡人舞動迪士尼」，仲可以參加舞會派對「惡人大宅舞會」，同《101斑點狗》嘅角色庫伊拉一齊跳舞。
進入「惡人大宅舞會」之前，會有造型師為參加者塗上面部彩繪同埋紋身貼紙，在場內又有駐場攝影師為擺出「最惡甫士」嘅參加者即場拍攝時尚雜誌封面相。舞會開始後，庫伊拉會出場演繹原創曲Shine，而造型出眾嘅參加者，仲有機會被邀請上台添！
至於萬聖節傳統活動Trick-or-Treat當然唔少得，遊客只要喺樂園入邊嘅「Halloween詭趣花園」設計專屬糖果袋，就可以去到唔同園區嘅南瓜頭流動趣玩站，搵鐵甲奇俠、蜘蛛俠、三眼仔同埋彈弓狗等迪士尼角色攞糖果。
更多港聞
相關新聞
