【Emily】歷史檔案館推「港昔旅遊」展
[2023.09.16] 發表
【明報專訊】爐峰塔(俗稱老襯亭)、宋城同埋虎豹別墅，相信係唔少年過半百港人嘅集體回憶，政府檔案處歷史檔案館噚日推出本年度專題展覽──「港昔旅遊」，邀請市民一齊踏上一趟以舊日香港為目的地嘅時光旅程。呢個展覽展出一系列1950至80年代同旅遊資訊相關嘅館藏，內容圍繞「觀光與風貌」、「購物天堂」、「美食天堂」、「城中盛事」四個主題。
展覽同時亦展現昔日香港各種生活面貌：唔少大型購物商場喺1960年代相繼落成，旅客除可搜羅各種禮品，亦可以喺街上商店及傳統市場尋寶；避風塘舢舨、海上食府、大牌檔同中式餐館都係本地人同旅客對香港美食嘅共同回憶。
大家即日起可以到觀塘翠屏道13號香港歷史檔案大樓二樓展覽廳，觀賞超過70件精選館藏，入口處另設主題佈景板畀大家「打卡」。展覽廳逢周一至周五上午9時至下午5時45分(公眾假期除外)開放，免費入場。
更多港聞
相關新聞
