【明報專訊】經民聯立法會議員梁美芬(Priscilla)除咗係基本法委員會委員，亦係城市大學法律系副教授。示威者星期一(11號)發起「三罷」，Priscilla當日如常返學教書，獲內地學生同內地媒體極力讚賞，更形容係「永生難忘的一節憲法課」。外交部駐香港特派員公署仲喺facebook分享Priscilla教書嘅情况，話Priscilla不向暴力屈服、堅持上憲法課。

外交部駐港特派員公署喺fb引述一個城大學生嘅帖，話星期一好多同學「歷經艱難險阻到了學校」，Priscilla亦準時現身上堂。但火警鐘響唔停，Priscilla建議大家不如取消呢堂，但有同學話好難先返到學校，所以Priscilla決定照常上課，「在保安把守教室的情况下，梁教授用麥克風上完了這節課。她說，We are a class of law. 我們堅持上這節課，就是要證明，我們不會向暴力屈服」。有同學話：「有人縱火救港，我們讀書報國！」

呢名城大生嘅帖文喺內地嘅社交媒體中廣傳，環球網都有報道。