【明報專訊】反修例風波持續，一向敢言嘅自由黨榮譽主席田北俊(圖右)都多次發聲，但對局勢發展似乎都有啲無力感。佢噚日上民主黨前主席劉慧卿(圖左)嘅網台節目《議會內外》時，就話已經冇把握成立獨立調查委員會(COI)可以令示威者收貨，對換特首都冇乜信心，又自嘲自己同卿姐都已經離地，勇武都唔會聽佢哋講嘢。卿姐聽到後隨即反駁：「我真係唔離地。」 田大少噚日接受卿姐訪問，佢話以前認為成立COI可以平息風波，但中大事件之後就冇乜信心，甚至見勇武派行過中環，打工仔會拍手讚佢哋，「每發生一件事，社會又撕裂啲、情况又惡劣啲」，所以已經冇乜把握示威者會對COI收貨。田大少又爆料，話唔少有錢佬上北京反映想成立COI，但中央唔想做，相信係因為要靠警方維持香港秩序，所以唔能夠令士氣出問題。 田大少又話，好嘅建制派應該係「保政府唔好出事」，有自己睇法就向政府反映，認為從幫政府忙嘅角度，有效過現時建制派收到政府、中聯辦指示就支持政府，「我多年從政都不認同」。佢表明唔支持取消區議會選舉，「希望選民積極投票，聲音要帶入區議會，北京會睇到」。
|
| |
| |
;){kind=small}
;)
