【明報專訊】噚日嘅反對修訂逃犯條例遊行萬人空巷，其實朝早都有支持修例嘅團體請願，但其中一場喺維園舉行嘅活動疑似甩底，搞到有市民撲空。
巿民向傳媒搭訕 問係咪有1800蚊
近日網上流傳，噚日早上10時，愛國愛港撐修例大聯盟會喺維園舉行集會，唔少傳媒噚日一早去咗維園，點知完全見唔到有人群聚集，其間一名市民上前搭訕，問係咪遊行有1800蚊收，同埋包一餐飯，Emily問佢邊度聽番嚟，佢就話見到網上係咁講，仲有個聯絡電話，但係噚日已經打唔到畀聯絡人。
後來有另一名阿伯路過，又問係咪參加遊行有錢派，但係問佢撐修例定反修例，佢都唔係咁清楚，只係話啱啱返香港，前晚喺一啲行山嘅WhatsApp群組見到有錢派，咪到維園碰運氣，點知去到發現唔對路。呢個阿伯又話近年舉辦呢類活動嘅團體查得好嚴，以防有無間道混入，所以唔係次次都可以參加到，不過今次有可能連舉辦活動嘅消息都係流料，所以令大家白行一趟。
;)
