【明報專訊】噚日係白色情人節，職工盟收集咗打工仔寫畀另一半嘅情信，由主席吳敏兒(Carol)讀出其中兩封。聽到打工仔女嘅辛酸，一向係性情中人嘅Carol忍唔住讀到喊，感嘆無論係巴士司機定工會組織者，辛酸都不足為外人道。
車長嘆永遠錯過囝囝童真歲月
第一封信係嚟自巴士司機康濂寫畀太太，康濂話揸巴士工時長，連見太太同囝囝嘅時間都冇，「錯過小朋友嘅童真歲月，永遠都追唔返」。佢又話個仔小學時，學校要一張全家福，但原來一家人都冇時間合照，諗番都覺得非常難過。
工會中人為女友長食貢丸米
第二封信嚟自工會組織者寫畀女友阿因，話畢業後愈來愈忙，試過難得一齊食飯，都要同工友講電話，但就算嘢食攤到凍晒，女友都會等埋佢先食；試過女友生日難得一齊睇戲，但遇上工潮，只能留低女友喺戲院。呢個工會中人話，有同事問佢點解成日食貢丸米，其實佢係想食一碗女友最鍾意食嘅米線，提醒有個默默支持自己志願嘅伴侶。
;)
