【明報專訊】立法會大樓現時得地下一間母乳餵哺室，民建聯葛珮帆(EQ)之前去信立法會秘書長陳維安，要求增加母乳餵哺室，Emily噚日喺立法會撞到EQ，佢話助理借用咗佢間房泵奶畀囡囡，所以佢要出嚟走動吓。EQ話助理覺得立法會唯一嘅母乳餵哺室唔夠通風，先要用佢間房，佢上周就收到陳維安口頭回應話會改裝另一間較為通風嘅房，改為母乳餵哺室。換言之，立法會將會多一間母乳餵哺室。

EQ話，現時立法會嘅母乳餵哺室空間唔大，又無間隔，多過一人使用時，只得一塊簾分隔。佢希望新設嘅餵哺室可以有間隔，等媽媽安心餵奶同泵奶，最好就有電掣同雪櫃，畀媽媽儲存母乳。而立法會秘書處回覆，確認會將立法會大樓地下嘅幼兒護理室改裝成新嘅哺集乳室，可同時供兩人使用，工程期望於今年底完成。

EQ話，平時若助理個BB無人照顧，助理可以帶埋BB返工，不過佢笑言都會有啲「disturbing」(騷擾)，唔係因為BB嘈，而係BB太可愛，所以佢成日會走去撩BB玩。