【明報專訊】警察一向予人強硬形象，不過，政務司長張建宗噚日出席「監警少青同樂日2019」活動期間，就講到警隊有5000幾個女警，「所以我哋(警隊)有柔情嘅一面，有溫馨嘅一面，有媽媽嘅一面」，又引述監警會主席梁定邦講，「警隊似綿羊咁，佢哋有溫柔、溫馨一面」。 引述梁定邦：警隊似綿羊咁 張建宗噚日喺活動致辭時話，警隊有5000幾個女警，佔警隊人數差唔多五分之一，督察級女性佔三分之一，警司級就係四分之一， 「所以我哋有柔情嘅一面，有溫馨嘅一面，有媽媽嘅一面」。佢形容，雖然香港警隊係世上難得，但始終有3萬幾個同事，每日同市民接觸唔多唔少都會出現問題，所以正需要獨立組織作監管，而呢個組織就係監警會。 梁定邦喺活動之後就被問到，近期不時有警務人員涉及刑事案件，係咪值得關注？梁就話警隊規模大，無可避免有害群之馬，應該喺培訓方面做得更好，希望警員執法時都會按紀律做事，增加市民信心。佢又話樂意向警員多講解監警會角色，亦有同警務處商討，日後喺警員培訓可以加添監警會元素。
|
| |
| |
;){kind=small}
;)
